Arrestimi në Greqi i të shumëkërkuarit 44-vjeçar shqiptar Nikolin Pali ka zbuluar detaje të reja kriminale, pasi i arrestuari dyshohet se ka pranuar autorësinë e dy vrasjeve të tjera të kryera në Shqipëri përpara vitit 2002.

Autoritetet helene dhe Interpol Tirana po punojnë gjithashtu për verifikimin e identitetit të tij të vërtetë, pasi dyshohet se i arrestuari është në të vërtetë Fran (Zef) Preldakaj, i dënuar më parë për vrasje dhe i shpallur në kërkim ndërkombëtar nga Shqipëria për tentativë grabitjeje me armë. Gjatë operacionit ku u arrestua edhe partnerja e tij 41-vjeçare për strehim të autorit, policia sekuestroi në apartamentin e tij një pistoletë, dy granata funksionale, pranga dhe dokumente të falsifikuara.

Ndaj 44-vjeçarit, i cili ndodhej prej gjashtë vitesh në arrati për vrasjen e dyfishtë me sëpatë të ish-partneres ukrainase dhe partnerit të saj në Loutraki, rezultojnë gjithsej gjashtë vendime dënimi. Hetuesit po verifikojnë gjithashtu mundësinë e përfshirjes së tij në ekzekutime të tjera me pagesë gjatë periudhës që ka qëndruar me dokumente të rreme në Greqi.