Policia greke ka arrestuar në zonën e Patisionit në Athinë 44-vjeçarin shqiptar Nikolin Pali, i cili ndodhej në arrati prej tetorit të vitit 2020 i akuzuar për vrasjen e dyfishtë të ish-partneres së tij ukrainase dhe bashkëshortit të saj farmacist.

I dënuar më parë në mungesë me dy burgime të përjetshme, Pali u lokalizua në një apartament ku u gjetën dokumente të falsifikuara, një pistoletë me fishekë dhe dy granata dore. Ndërhyrja e Departamentit të Vrasjeve parandaloi përdorimin e armëve nga i shumëkërkuari, ndërsa autoritetet dyshojnë se ai po përgatiste një tjetër sulm dhe po hetojnë përfshirjen e tij të mundshme në ngjarje të tjera kriminale gjatë viteve të arratisë.

Krimi i rëndë ndodhi më 11 tetor 2020 në Loutraki, ku 44-vjeçari hyri me çelës të vjedhur në banesën e pushimit të ish-partneres 43-vjeçare Svetlana dhe goditi për mort me sëpatë atë dhe partnerin e saj 42-vjeçar, Ioannis Zonitsas. Pas krimit, ai dogji automjetin e viktimës për të zhdukur gjurmët dhe arriti t’u shmangej kërkimeve të policisë greke dhe shqiptare për gjashtë vite me radhë.