LONDËR — Çmimet e naftës shënuan rritje të konsiderueshme gjatë ditës së sotme në bursat ndërkombëtare, ndërsa investitorët po monitorojnë me shqetësim rrezikun e një përshkallëzimi të ri ushtarak mes Shteteve të Bashkuara dhe Iranit pas përfundimit të zgjedhjeve të mesmandatit në SHBA.

Kontratat e ardhshme për naftën bruto të llojit Brent u rritën me 1.67 për qind duke kapur kuotën e 99.90 dollarëve për fuçi, ndërsa nafta bruto amerikane West Texas Intermediate (WTI) pësoi një rritje prej 1.43 per qind, duke arritur në 91.69 dollarë për fuçi. Vëmendja e tregjeve financiare është përqendruar te mundësia nëse përmbyllja e procesit zgjedhor amerikan mund të hapë rrugën për veprime të reja ushtarake ndaj Teheranit, zhvillim ky që kërcënon drejtpërdrejt furnizimin me energji nga Lindja e Mesme.

Kryetari i kompanisë ndërkombëtare të kërkimeve "Rapidan Energy Group", Bob McNally, vlerësoi se ekziston një mundësi prej 80 per qind që përplasjet ushtarake të rifillojnë në rajon. Ai parashikoi se në rast të një skenari të tillë, si çmimi i naftës Brent ashtu edhe i asaj WTI do të kapërcejnë kufirin e 100 dollarëve për fuçi.

Sipas analizës së McNally, Presidenti i SHBA-së Donald Trump mbetet i vendosur të parandalojë Iranin nga pajisja me armë bërthamore dhe të kërkojë shkatërrimin e kapaciteteve të tij atomike, kushte këto që udhëheqja iraniane nuk është e gatshme t’i pranojë.

Pavarësisht rreziqeve për përshkallëzim ushtarak, në prapaskenë vazhdojnë edhe përpjekjet diplomatike. Teherani zyrtar mësohet se i ka përcjellë Uashingtonit përmes ndërmjetësimit të Katarit një propozim të ri mbi programin e tij bërthamor, në përpjekje për të krijuar hapësirë për negociata.

Ndërkohë, situata e navigimit detar në Ngushticën e Hormuzit mbetet tepër kritike. Irani njoftoi se tre anije cisterne janë sulmuar në këtë aks detar strategjik, ndërsa të dhënat nga Operacionet e Tregtisë Detare të Mbretërisë së Bashkuar konfirmojnë se incidentet ndaj anijeve tregtare po i afrohen niveleve rekord, duke mbajtur lart presionin mbi çmimet globale të energjisë.