TIRANË — Policia e Tiranës ka vendosur 12 masa administrative ndaj disa protestuesve, të cilët gjatë tubimit të zhvilluar në kryeqytet kanë bllokuar rrugën dhe kanë penguar qarkullimin e automjeteve.

Në zbatim të Aktit Normativ nr. 5, datë 28.10.2026, konkretisht pikës 2 të nenit 24/1, strukturat e policisë kanë plotësuar 12 procesverbale për konstatimin e kundërvajtjeve administrative gjatë protestës në bulevardin “Dëshmorët e Kombit”. Sanksionet u vendosën ndaj shtetasve që bllokuan aksin rrugor, duke refuzuar t’u bindeshin thirrjeve të përsëritura të punonjësve të rendit përmes megafonit për lirimin e rrugës.

Për secilin nga personat e përfshirë është caktuar masa administrative me gjobë në vlerën 5 000 lekë. Gjithashtu, materialet procedurale përkatëse i janë referuar Prokurorisë pranë Gjyskatës së Shkallës së Parë të Juridiksionit të Përgjithshëm Tiranë për veprime të mëtejshme.