TIRANË — Protesta studentore ndaj qeverisë dhe kryeministrit Edi Rama po vijon të shoqërohet me bojkotimin e procesit mësimor në disa universitete të vendit.

Prej disa javësh, të rinjtë janë angazhuar në tubime dhe marshime në Tiranë, duke u ndalur në auditoret e fakulteteve të ndryshme për të kërkuar mbështetjen e bashkëmoshatarëve dhe zgjerimin e mëtejshëm të lëvizjes. Përgjatë protestave, ata kanë bërë thirrje të vazhdueshme për ndërprerjen e mësimit dhe bashkimin me kauzën e tyre.

Marshimet dhe veprimet e bojkotit janë shtrirë në ambientet e Universitetit të Arteve, Fakultetit të Drejtësisë, Fakultetit Ekonomik, si dhe Universitetit Politeknik, ndërsa edhe gjatë ditës së sotme bojkoti i leksioneve pritet të vijojë.

Deri më tani, studentët kanë refuzuar ftesat e përsëritura për dialog nga ana e kryeministrit Rama, duke këmbëngulur se largimi i tij nga detyra mbetet kërkesa kryesore e lëvizjes së tyre.