NEW YORK — Një e enjte e zezë është shënuar në bursën e Wall Street-it, ku tregjet financiare amerikane kanë pësuar rënie të forta aksionesh, duke fshirë rreth 3.2 trilionë dollarë nga vlera e përgjithshme e tregut.

Tërheqja masive e investitorëve ka goditur veçanërisht aksionet e kompanive të sektorit të teknologjisë dhe inteligjencës artificiale, të cilat pësuan rënie për të dytën ditë radhazi. Pasiguria në rritje lidhur me ritmin e investimeve masive në infrastrukturën e inteligjencës artificiale, si dhe ndërtimin e qendrave të reja të të dhënave, ka nxitur valën e shitjeve.

Lëvizjet me rënie në bursa fshinë fitimet e konsiderueshme të regjistruara menjanë pas procesit të zgjedhjeve të mesmandatit në SHBA. Në klimën e pasigurisë financiare kanë ndikuar edhe zhvillimet politike në Uashington, ku frika se dominimi i demokratëve mund të sjellë frenim apo pengesa rregullatore në projektet e zgjerimit të qendrave të të dhënave ka rritur trysninë mbi kompanitë e kësaj industrie.

Treguesit kryesorë në bursa shënuan rënie të theksuara gjatë mbylljes së seancës. Indeksi Industrial Dow Jones ra me 3.44 për qind duke u ndalur në 51,521.28 pikë, S&P 500 humbi 4.3 për qind duke zbritur në 7,353.80 pikë, ndërsa indeksi i teknologjisë Nasdaq regjistroi humbjen më të madhe me 5.52 per qind, duke arritur në kuotën e 24,315 pikëve.