Kryeministri Edi Rama i ka bërë sërish thirrje për dialog studentëve protestues, të cilët prej disa javësh po vijojnë tubimet në Tiranë duke kërkuar largimin e tij nga detyra. Përmes një postimi në rrjetet sociale, kreu i qeverisë ka ndarë sërish fotografinë e tryezës prej guri me mbishkrimin “Dialog”, duke ritheksuar gatishmërinë e tij për komunikim të drejtpërdrejtë me të rinjtë.

Nga ana tjetër, protestuesit kanë refuzuar vazhdimisht ftesat e kryeministrit, duke këmbëngulur se kërkesa e tyre kryesore mbetet dorëheqja e tij nga postet drejtuese. Lëvizja studentore vazhdon me marshime në rrugët kryesore të kryeqytetit dhe ndalesa të njëpasnjëshme pranë fakulteteve të ndryshme, me qëllim zgjerimin e bojkotit dhe rritjen e mbështetjes. Kësaj kauze i janë bashkuar publikisht edhe pedagogë të ndryshëm, të cilët kanë shprehur solidaritet me kërkesat e studentëve.