Shqipëria synon të hyjë zyrtarisht në tregun ndërkombëtar të krediteve të karbonit deri në vitin 2035, ndërsa ka nisur punën për zhvillimin e një sistemi kombëtar për tregtimin e emetimeve të gazeve serrë (ETS), i cili do të përafrohet me standardet e Bashkimit Europian. Këto plane janë bërë me dije në "Raportin për tregun e pyjeve në Shqipëri, 2026", të dorëzuar nga Ministria e Mjedisit pranë Komisionit Ekonomik të Kombeve të Bashkuara për Europën (UNECE) më 23 tetor 2026, gjatë sesionit të 84-t të Komitetit për Pyjet dhe Industrinë Pyjore.

Sipas dokumentit zyrtar, kuadri ligjor dhe strukturor i Shqipërisë për tregjet e karbonit është ende në fazat e para të zhvillimit. Në kuadër të Kontributit të saj të Tretë të Përcaktuar në Nivel Kombëtar (NDC 3.0), vendi shpreh synimin për të marrë pjesë në bashkëpunimin vullnetar sipas Nenit 6 të Marrëveshjes së Parisit, i cili lejon transferimin ndërkombëtar të rezultateve të reduktimit të emetimeve ndërmjet shteteve partnere.

Pjesë e rëndësishme e kësaj strategjie mjedisore është edhe ngritja e sistemit kombëtar ETS, një mekanizëm i ngjashëm me EU ETS të Bashkimit Europian që vendos kufij për emetimet e gazeve me efekt serrë dhe u mundëson subjekteve të tregtojnë lejet përkatëse. Megjithëse raporti i UNECE-s nuk përcakton ende një afat të saktë për nisjen e funksionimit të këtij sistemi ose sektorët ekonomikë që do të përfshihen, potenciali kryesor i Shqipërisë lidhet me pyllëzimin, restaurimin dhe menaxhimin e qëndrueshëm të pyjeve. Reduktimet ose përthithjet e certifikuara të karbonit pritet të shndërrohen në kredite që mund t’u shiten blerësve ndërkombëtarë.