Punonjësit përgjegjës në institucionet publike do të përballen me penalitete të ashpra financiare në rast se nuk përmbushin detyrimet ligjore në fushën e kontabilitetit. Sipas masave të reja të propozuara, gjobat e parashikuara për shkeljet e konstatuara do të variojnë nga një deri në tre paga mujore për personat përgjegjës.

Masa ndëshkuese është përcaktuar në projektligjin e ri për kontabilitetin në sektorin publik, i cili ka kaluar tashmë për shqyrtim në Këshillin e Ministrave. Nisma e re ligjore synon të rrisë llogaridhënien dhe të përcaktojë më qartë përgjegjësitë e punonjësve për administrimin, dokumentimin dhe mbajtjen e kontabilitetit në strukturat shtetërore.

Sipas projektligjit, vlera konkrete e masës administrative do të llogaritet në mënyrë të shkallëzuar, në varësi të natyrës së shkeljes administrative dhe shkallës së përgjegjësisë që mban punonjësi në institucionin përkatës.