Akuzohet se masakroi nënën me thikë në Itali, 21-vjeçari shqiptar merret në pyetje, por nuk jep asnjë motiv bindës

Autoritetet gjyqësore italiane kanë zhvilluar seancën e marrjes në pyetje të 21-vjeçarit shqiptar Eduart Xhani, i cili akuzohet për vrasjen e nënës së tij, 39-vjeçares Meleqe Lusha, në banesën e tyre në Chiari të Brescias.

Seanca për konfirmimin e masës së sigurisë u zhvillua në ambientet e repartit psikiatrik të spitalit, ku i riu po mbahet nën vëzhgim pas ekzaminimeve të para nga specialistët mjekësorë.

Para gjyqtarit të Brescias, 21-vjeçari ka konfirmuar autorësinë e krimit, duke përsëritur rrëfimin që u kishte bërë karabinierëve menjëherë pas ngjarjes, teksa ka pohuar se kishte tentuar të vriste edhe veten përpara se të ndërmerrte aktin fatal.

Megjithatë, përgjigjet e dhëna prej tij lidhur me arsyet apo motivet që e shtynë drejt këtij gjesti kanë qenë të paqarta dhe konfuze, duke lënë pa përgjigje pyetjet e hetuesve mbi shkaqet e sulmit të papritur ndaj nënës së tij në kuzhinën e shtëpisë.

Ngjarja e rëndë ndodhi mbrëmjen e së martës, kur i riu, i cili punonte si kamerier dhe nuk kishte precedentë penalë, qëlloi për vdekje me thikë 39-vjeçaren pa pasur ndonjë debat apo tension të dukshëm paraprak.

Pas krimit, ai u end për rreth dhjetë orë me automjetin e tij të tipit Audi nëpër provincat e Brescias dhe Kremonës, për t’u dorëzuar më pas vetë në dyert e kazermave të karabinierëve në Kremonë, ku u tha efektivëve se kishte vrarë nënën e tij.

Gjykatësi ka vendosur të marrë kohë për të shqyrtuar gjendjen e tij psikologjike përpara se të marrë një vendim përfundimtar për masën e sigurisë.