New York, 5 nëntor 2026 – Gjashtë persona kanë humbur jetën dhe disa të tjerë kanë mbetur të plagosur si pasojë e një zjarri masiv që përfshiu një ndërtesë banimi në lagjen Brooklyn të New York-ut.

Zjarri shpërtheu në orët e para të mëngjesit të së enjtes, në zonën pranë Sunset Park, ndërsa alarmi për flakët u dha rreth orës 01:40 me orën lokale. Në vendngjarje u angazhuan më shumë se 230 zjarrfikës dhe punonjës të shërbimeve të emergjencës.

Sipas Departamentit të Zjarrfikësve të New York-ut (FDNY), kur ekipet mbërritën, konstatuan se flakët kishin përfshirë katin e parë dhe të dytë të ndërtesës.

Katër persona u gjetën pa shenja jete në vendngjarje. Ndërkohë, një burrë dhe një grua u transportuan në spital, ku më pas u konfirmua vdekja e tyre, bëri të ditur Departamenti i Policisë së New York-ut.

Nga zjarri mbetën të plagosur edhe gjashtë civilë të tjerë, dy prej të cilëve ndodhen në spital në gjendje kritike. Lëndime pësuan gjithashtu tre zjarrfikës.

Në operacionin e emergjencës mori pjesë edhe një njësi e specializuar për materialet e rrezikshme, për shkak të pranisë së një baterie litium-jon në ndërtesë. Megjithatë, autoritetet nuk kanë sqaruar ende nëse bateria ka pasur lidhje me rënien e zjarrit.

Kryebashkiaku i New York-ut, Zoran Mamdani, reagoi pas ngjarjes duke shprehur dhimbjen për viktimat. Ai u bëri thirrje banorëve të qytetit që të solidarizohen me familjet e prekura dhe të urojnë shërim të plotë për të plagosurit.