DIBËR — Një ngjarje e rëndë me pasojë humbjen e jetës së një punonjësi është regjistruar ditën e sotme në fshatin Vasie të Kalasë së Dodës, ku një elektriçist ka ndërruar jetë gjatë kryerjes së detyrës.

Viktima është identifikuar si shtetasi Lulzim Shehu, rreth 60 vjeç, elektriçist i zonës. Ngjarja ka ndodhur rreth orës 11:45, teksa ai po punonte për ndërrimin dhe vendosjen e shtyllave elektrike.

Sipas të dhënave të para nga vendngjarja, sapo 60-vjeçari ka këputur telat e përcjellësve elektrikë, shtylla është rrëzuar duke e zënë poshtë e duke i shkaktuar dëmtime të rënda trupore. I dëmtuari u nxor nga vendi i incidentit dhe u transportua me urgjencë drejt spitalit, por si pasojë e plagëve të marra ka ndërruar jetë në ambientet spitalore.

Trupi i pajetë i 60-vjeçarit është dërguar në morgun e Spitalit Rajonal të Dibrës për ekzaminimet mjekoligjore. Shërbimet e Policisë dhe grupi hetimor kanë mbërritur menjëherë në vendngjarje dhe po kryejnë të gjitha veprimet procedurale për zbardhjen e plotë të rrethanave dhe shkaqeve të kësaj ngjarjeje tragjike.

Dibër/Informacion paraprak

Më datë 05.11.2026, rreth orës 11:45, në fshatin Vasie, Dibër, shtetasi L .Sh., rreth 60 vjeç, me profesion elektriçist, dyshohet se gjatë kryerjes së punimeve për vënien e një shtylle elektrike, është rrëzuar shtylla dhe për pasojë e ka zënë poshtë, ku si pasojë e dëmtimeve të marra, 60-vjeçari, ka ndërruar jetë në spital.

Shërbimet e Policisë dhe grupi hetimor ndodhet në vendngjarje dhe po kryejnë veprimet hetimore për sqarimin e rrethanave të ngjarjes.