ELBASAN — Ekspertët e Institutit të Ndërtimit kanë mbërritur në terren për të kryer vlerësimin teknik të pallatit në lagjen “Qemal Stafa” në Elbasan, i cili u dëmtua rëndë një ditë më parë si pasojë e shpërthimit të gazit.

Pas këqyrjes së strukturës, ekspertët kanë deklaruar se godina është tejet e rrezikshme dhe plotësisht e pabanueshme, duke vendosur se ndërtesa duhet të shembet. Drejtoresha e Institutit të Ndërtimit, Persida Shkrepa, u shpreh zyrtarisht se pallati do të demolohet plotësisht dhe do të rindërtohet nga e para për banorët.

Nga deflagracioni i fuqishëm, struktura e katërt e godinës u shemb duke rënë mbi katin e tretë dhe duke shkaktuar dëmtime të rënda kapilare në të gjithë ndërtesën. Si pasojë e ngjarjes humbën jetën 69-vjeçari Hamit Ibro dhe 82-vjeçarja Hatixhe Berisha, si dhe morën asistencë mjekësore 10 banorë të tjerë.

Aktualisht, zonës i është vendosur një perimetër i rreptë sigurie nga forcat e policisë, ndërsa 15 familjet e evakuuara vazhdojnë të qëndrojnë të akomoduara në konvikte dhe te të afërmit e tyre deri në fillimin e procesit të demolimit.