BULQIZË — Detaje tronditëse janë zbardhur nga vrasja e 61-vjeçarit Urim Fiku në fshatin Gjon të Bulqizës, ku bashkëshortja e tij Sadete Fiku dhe i biri janë arrestuar nga policia nën akuzën e ekzekutimit të familjarit dhe inskenimit të ngjarjes si një sulm nga kafshët e egra.

Sipas të dhënave nga hetimet, 61-vjeçari është qëlluar pas shpine me pistoletë, me plumbin që i ka përshkuar trupin dhe ka dalë në gjoks, ndërsa ekspertët mjekoligjorë kanë konstatuar edhe një goditje të rëndë në kokë me sëpatë. Për të fshehur gjurmët e krimit, bashkëshortja dhe i biri i kanë ndërruar rrobat viktimës, ndërsa i biri i ka prerë veshjet e përgjakura me gërshërë duke i hedhur në tualetin e banesës, ku më pas u sekuestruan nga policia.

Pas ngjarjes së ndodhur në orët e para të mëngjesit, familjarët e transportuan trupin në spitalin e Bulqizës duke pretenduar se 61-vjeçari ishte sulmuar nga një ari dhe kërkuan tërheqjen e menjëhershme të trupit për ceremoni mortore. Njoftimi i policisë nga mjekët solli dërgimin e trupit në Tiranë për autopsi, ku u zbulua plaga e armës së zjarrit.

Gjatë marrjes në pyetje, bashkëshortja Sadete Fiku ka pranuar se motivi i krimit lidhej me xhelozinë dhe dyshimet për një lidhje jashtëmartesore të 61-vjeçarit. Ajo deklaroi se e kishte fshehur fillimisht armën e zjarrit, e cila më pas u zhvendos nga i biri në një vend tjetër.

Pistoleta e përdorur në krim u gjet dhe u sekuestrua pasi vendndodhja e saj u tregoua nga i biri i viktimës. Ndaj Sadete Fikut dhe djalit të saj tashmë rëndojnë akuzat penale për “Vrasje për shkak të marrëdhënieve familjare”, e kryer në bashkëpunim, si dhe “Mbajtja pa leje e armëve të zjarrit dhe municionit”.