TIRANË — Policia e Tiranës ka finalizuar operacionin e koduar “Eksponenti”, duke vënë në pranga 49-vjeçarin Eduart Dushku, i njohur si “i forti i Saukut”, i cili u kap në flagrancë duke transportuar një armë zjarri me motomjet.

Strukturat e Seksionit për Hetimin e Trafiqeve, në bashkëpunim me shërbimet e Forcës së Posaçme “Shqiponja”, ndaluan për kontroll motomjetin me të cilin lëvizte 49-vjeçari në Rrugën e Elbasanit. Gjatë kontrollit fizik, shërbimet e policisë i gjetën dhe i sekuestruan një armë zjarri pistoletë me municion luftarak, me të cilën dyshohet se po kryente trafikim.

Në vijim të veprimeve hetimore, policia ushtroi kontroll edhe në banesën e të arrestuarit, ku u gjet dhe u sekuestrua një jelek antiplumb. Gjithashtu, në cilësinë e provës materiale u morën motomjeti dhe telefoni celular i 49-vjeçarit.

Sipas njoftimit zyrtar të Policisë së Tiranës, Eduart Dushku është një person me precedentë të theksuar kriminalë në fushat e krimeve kundër jetës dhe mbajtjes pa leje të armëve të zjarrit. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme ligjore.

Njoftimi i policisë:

Arrestohet në Rrugën e Elbasanit, duke transportuar armë zjarri, me motomjet, një 49-vjeçar me precedent të theksuar për krime kundër jetës dhe për armëmbajtje.

Sekuestrohen 1 armë zjarri (pistoletë) me municion, jeleku antiplumb që i arrestuari kishte në banesë, si dhe motomjeti dhe celulari i tij.

Specialistët e Seksionit për Hetimin e Trafiqeve, në bashkëpunim me shërbimet e Forcës së Posaçme “Shqiponja”, si rezultat i administrimit të shpejtë të informacioneve të siguruara gjatë punës operative, finalizuan operacionin e koduar “Eksponenti”, në kuadër të të cilit u arrestua në flagrancë shtetasi E. D., 49 vjeç, banues në Tiranë.

Motomjeti me të cilin lëvizte ky shtetas, u ndalua për kontroll në Rrugën e Elbasanit. Gjatë kontrollit në të, u gjet 1 armë zjarri (pistoletë) me municion, të cilën dyshohet se shtetasi E. D. do ta trafikonte.

Më tej, gjatë kontrollit në banesën e këtij shtetasi, u gjet 1 jelek antiplumb.

Materialet procedurale iu referuan Prokurorisë, për veprime të mëtejshme.