ELBASAN — Ekipet e kërkim-shpëtimit të Forcave të Armatosura kanë gjetur nën rrënojat e pallatit 5-katësh në lagjen “Beqir Dardha” trupin e pajetë të 69-vjeçarit Hamit Ibro, duke çuar në dy numrin e viktimave nga shpërthimi i fuqishëm që tronditi qytetin e Elbasanit.

I moshuari rezultonte i zhdukur që prej momentit të ngjarjes, ndërsa forcat e emergjencës punuan për orë të tëra nën rrënoja deri në nxjerrjen e trupit të tij. Nga shpërthimi i ditës së mërkurë humbi jetën edhe një 82-vjeçare e cila banonte në apartamentin ngjitur, ndërsa 10 persona të tjerë morën ndihmë mjekësore në spital si pasojë e asfiksisë dhe ndodhen jashtë rrezikut për jetën.

Deflagracioni i fuqishëm shkaktoi dëme të rënda strukturore, ku muret e apartamentit dhe shkallët e pallatit u shembën plotësisht, duke bërë që tre kate të godinës të bashkohen në një. Objekti është shpallur zyrtarisht i pabanueshëm dhe të gjithë banorët janë evakuuar nga autoritetet me qëllim sistemimin e tyre në strehime të sigurta.

Drejtori i Policisë së Qarkut Elbasan, Kastriot Skënderaj, i pyetur nga gazetarët mbi shkaqet e ngjarjes, deklaroi se rasti ndodhet nën hetim intensiv nga ekspertët teknikë.

Ai sqaroi se aktualisht dyshohet për shpërthimin e një bombole gazi, pasi në vendngjarje është ndier erë e fortë gazi pas shpërthimit si dhe në hapësirën e garazhit është gjetur një bombol gazi, me hetuesit që prasin ekspertizën përfundimtare për përcaktimin e saktë të shkakut.