Teksa përpjekjet për lokalizimin e 69-vjeçarit që ndodhet nën rrënojat e pallatit të shkatërruar nga shpërthimi në Elbasan vazhdojnë në kushte ekstreme, në terren ka mbërritur Komandanti i Bazës së Mbështetjes dhe Emergjencave Civile, Kolonel Hajdar Gurra.

Zyrtari i lartë identifikoi personin e humbur si shtetasin Hamit Ibro, 69 vjeç, ndërsa bëri me dije se të dhënat e marra nga pajisjet teknologjike në terren nuk japin shumë shpresë për jetën e tij. Ndërhyrja e ekipeve të specializuara po kryhet nën masa të rrepta sigurie për shkak të strukturës tërësisht të dëmtuar të ndërtesës.

“Në terren janë dy ekipe kërkim-shpëtimi, 16 persona me të gjitha mjetet e nevojshme.

Operacioni paraqet rrezikshmëri shumë të lartë pasi godina është tërësisht e shkatërruar.

Do të vijojmë kërkimet deri në fund duke ruajtur të gjithë parametrat e sigurisë për punonjësit tanë.

Nga kamerat termike që kemi përdorur, ka shumë pak gjasa që 69-vjeçari Hamit Ibro të gjendet i gjallë.

Jemi duke kërkuar në pjesën e godinës ku sipas informacioneve të familjarëve dhe strukturave vendore, mendohet të ketë qenë personi.”- deklaroi kolonel Gurra