Hetimet e Policisë së Bulqizës kanë zbardhur rrethanat e vrasjes së 61-vjeçarit Urim Fiku, ngjarje e cila fillimisht u raportua nga familjarët e tij si një sulm fatal nga një ari në pyll.

Zbulimi i rrethanave të vërteta erdhi pasi zyrtarët lokalë konstatuan vdekjen e viktimës dhe njoftuan menjëherë organet e rendit, duke parandaluar kështu tentativën e familjarëve për të tërhequr trupin e paimjetuar dhe për ta varrosur pa iu nënshtruar ekspertizës ligjore.

Ishte bashkëshortja e të ndjerit, Sadete Fiku, dhe i biri, Gëzim Fiku, të cilët telefonuan spitalin e Bulqizës duke thënë se Urimi ishte plagosur rëndë pasi e kishte sulmuar një ari.

Nënë e bir i thanë spitalit se 61-vjeçari erdhi në gjendje të rëndë pasi e kishte kafshuar ariu dhe kishte humbur ndjenjat përpara banesës. Ata kërkuan ndihmën e spitalit që të sillte ambulancën.

Pak minuta më vonë telefonuan sërish spitalin dhe i thanë që të mos e sjellin autoambulancën sepse Urimi kishte vdekur dhe do të vijonin me procedurat e varrimit.

Nga spitali u njoftuan autoritetet dhe këqyrja e detajuar nga ekspertët mjeko-ligjorë hodhi poshtë versionin e sulmit nga kafsha e egër, duke konfirmuar se 61-vjeçari ishte qëlluar pas shpine me një plumb tejshkues pistolete që i kishte dalë në gjoks.

Përveç plagës së armës së zjarrit, në kokën e viktimës u konstatua edhe një dëmtim i rëndë i shkaktuar nga një mjet i fortë prerës, i dyshuar si sëpatë.

Rezultatet e ekspertizës çuan në zbardhjen e krimit dhe arrestimin e djalit të viktimës si autor të drejtpërdrejtë të ngjarjes, me bashkëpunimin e të ëmës.