“U hodha nga ballkoni, më ra dera në kokë”, banorët rrëfejnë tmerrin nga shpërthimi i fuqishëm në Elbasan

Elbasan – Momente paniku dhe frike kanë përjetuar banorët e një pallati në Elbasan, pas një shpërthimi të fuqishëm që ndodhi në një apartament dhe shkaktoi dëme të konsiderueshme materiale.

Shpërthimi ka tronditur edhe ndërtesat përreth, ndërsa banorët e zonës e kanë krahasuar zhurmën me atë të një bombe. Disa prej tyre kanë rrëfyer momentet dramatike kur dëgjuan shpërthimin dhe panë dëmet e shkaktuara.

Një nga banorët e ndërtesës së prekur tregoi se, në përpjekje për të shpëtuar, është hedhur nga ballkoni. Ai tha se dera e ballkonit i kishte rënë në kokë, ndërsa djali i tij bërtiste për ndihmë.

“Kam gjysmë ore që kam dalë. Më ra në kokë dera e ballkonit, djali po vinte nga shkolla. Djali bërtiste. Imagjino të dëgjosh fëmijën të thotë ‘Ndihmë!’ dhe të mos dilja dot. U hodha nga ballkoni më pas. Dëmi është deri në 80 milionë lekë. Para një muaji i hodha prapë lekë”, u shpreh banori, duke treguar edhe shenjat e dëmtimeve që kishte pësuar.

Edhe banorët e pallateve pranë vendit të ngjarjes treguan se fuqia e shpërthimit ishte e jashtëzakonshme.

“Jetoj te pallati tjetër. Ishte një shpërthim shumë i madh, si bombë. Nuk e di nëse ka të lënduar”, deklaroi një banor.

Një tjetër qytetar tregoi se, sapo dëgjoi zhurmën, doli për të parë çfarë kishte ndodhur dhe u përball me pamjet e shkatërrimit.

“Shtëpinë e kam këtu afër. E dëgjuam shpërthimin, ishte diçka e madhe. Erdhëm këtu dhe pamë se ajo ishte shembur. Nuk e dimë se çfarë ka qenë. Erdhi policia dhe zjarrfikëset. Ishte edhe vendi i ngushtë, ku nuk hyn dot asgjë”, u shpreh ai.

Banorë të tjerë e përshkruan situatën si tepër të frikshme, duke theksuar se goditja ishte aq e fortë sa u ndie edhe brenda banesave përreth.

“Ishte e tmerrshme, ishte një shpërthim i fuqishëm. Nga sa shohim, dëmi është i madh. E frikshme ajo që shohim”, tha një dëshmitar.

“U trondit shtëpia, shumë i madh ishte shpërthimi. Ne po rrinim dhe thamë: ‘Çfarë u bë?’ Shumë e frikshme”, rrëfeu një tjetër banor.

Sipas dëshmive nga vendngjarja, pas shpërthimit kanë mbërritur forcat e policisë dhe shërbimet zjarrfikëse. Banorët kanë ngritur shqetësimin edhe për hapësirat e ngushta pranë ndërtesës, të cilat mund ta vështirësojnë ndërhyrjen e mjeteve të emergjencës.

Shkaku i shpërthimit mbetet ende i paqartë nga informacionet e disponueshme.