Sektori për Hetimin e Krimeve të Rënda në Drejtorinë Vendore të Policisë Dibër, nën drejtimin e Prokurorisë, ka zbardhur rrethanat e ngjarjes së ndodhur më 3 nëntor në fshatin Godvi të Bulqizës. Ndonëse fillimisht familjarët njoftuan se shtetasi Urim Fiku kishte humbur jetën nga sulmi i një kafshe të egër, hetimet intensive dhe ekzaminimet mjekoligjore zbuluan se ai është vrarë me armë zjarri dhe mjete të forta prerëse.

Në vijim të veprimeve procedurale, strukturat e policisë kanë bërë të mundur ndalimin e bashkëshortes së viktimës, Sadete Fiku, 57 vjeçe, si dhe djalit të tij, Gazmir Fiku, 33 vjeç. Autoritetet dyshojnë se të dy personat, në bashkëpunim me njëri-tjetrin, kanë kryer vrasjen e kryefamiljarit brenda ambienteve të banesës së tyre.

Gjatë këqyrjes së vendit të ngjarjes, grupi hetimor ka sekuestruar në cilësinë e provës materiale një armë zjarri pistoletë të modelit 54 me fishekë, si dhe një gëzhojë të gjetur në oborrin e shtëpisë. Materialet përkatëse i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Dibër për veprat penale “Vrasja për shkak të marrëdhënieve familjare” dhe “Mbajtja pa leje e armëve dhe e municioneve”, të kryera në bashkëpunim.

DVP Dibër/Zbardhet ngjarja e ndodhur në fshatin Godvi, Bulqizë, ku fillimisht u raportua se një shtetas kishte humbur jetën pas sulmit nga një kafshë e egër.

Arrestohen bashkëshortja dhe djali i tij, të dyshuar për vrasjen e tij me armë zjarri dhe mjete të forta prerëse.

Më datë 04.11.2026, nga Sektori për Hetimin e Krimeve të Rënda në DVP Dibër, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Dibër, pas një hetimi intensiv, u bë i mundur dokumentimi i ngjarjes së ndodhur më datë 03.11.2026, në fshatin Godvi, Bulqizë.

Fillimisht, familjarët e shtetasit U. F. raportuan se ai kishte humbur jetën si pasojë e sulmit nga një kafshë e egër (ari), por nga hetimet e kryera dhe ekzaminimet mjekoligjore rezultoi se ky shtetas ishte vrarë me armë zjarri.

Në vijim të veprimeve hetimore, u bë ndalimi i shtetasve:

* S. F., 57 vjeçe;

* G. F., 33 vjeç;

të dy banues në fshatin Godvi (përkatësisht bashkëshortja dhe djali i shtetasit U. F.).

Ndalimi i tyre u bë pasi dyshohet se, në bashkëpunim me njëri-tjetrin, kanë vrarë me armë zjarri dhe mjete të forta prerëse shtetasin U. F.

Në cilësinë e provës materiale u sekuestruan një armë zjarri pistoletë, model 54, me fishekë, si dhe një gëzhojë pistolete, e gjetur në oborrin e banesës.

Materialet procedurale iu referuan Prokurorisë Dibër për veprat penale “Vrasja për shkak të marrëdhënieve familjare” dhe “Mbajtja pa leje e armëve dhe municioneve”, kryer në bashkëpunim.