Zbardhet ngjarja e ndodhur në fshatin Godvi, Bulqizë, ku fillimisht u raportua se një shtetas kishte humbur jetën pas sulmit nga një kafshë e egër.

Arrestohen bashkëshortja dhe djali i 40 vjeçarit Urim Fiku, të dyshuar për vrasjen e tij me armë zjarri dhe mjete të forta prerëse.

Policia lokale tha se sot, nga Sektori për Hetimin e Krimeve të Rënda në DVP Dibër, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Dibër, pas një hetimi intensiv, u bë i mundur dokumentimi i ngjarjes së ndodhur dj3, në fshatin Godvi, Bulqizë.

Fillimisht, familjarët e shtetasit Urim Fiku, raportuan se Urimi kishte humbur jetën si pasojë e sulmit nga një kafshë e egër (ari).

Por nga hetimet e kryera dhe ekzaminimet mjekoligjore rezultoi se ky shtetas ishte vrarë me armë zjarri.

Në vijim të veprimeve hetimore, u bë ndalimi i gruas së të ndjerit, Sadete Fiku, 57 vjeçe dhe djalit të tyre, Gazmir Fiku, 33 vjeç, që të dy banues në fshatin Godvi (përkatësisht bashkëshortja dhe djali i shtetasit Urim Fiku).

Ndalimi i tyre u bë pasi dyshohet se, në bashkëpunim me njëri-tjetrin, kanë vrarë me armë zjarri dhe mjete të forta prerëse shtetasin Urim Fiku, tha policia.

Në cilësinë e provës materiale u sekuestruan një armë zjarri pistoletë, model 54, me fishekë, si dhe një gëzhojë pistolete, e gjetur në oborrin e banesës.

Materialet procedurale iu referuan Prokurorisë Dibër për veprat penale “Vrasja për shkak të marrëdhënieve familjare” dhe “Mbajtja pa leje e armëve dhe municioneve”, kryer në bashkëpunim.