Identifikohen viktima dhe autori i dyshuar i ngjarjes në Bulqizë, Edison Lala u qëllua për vdekje gjatë gjuetisë, shoqërohet Bledian Firi

Bulqizë – Janë bërë të ditur emrat e dy personave të përfshirë në ngjarjen tragjike të ndodhur këtë të mërkurë në Bulqizë, ku një 29-vjeçar humbi jetën pasi dyshohet se u qëllua aksidentalisht me armë gjahu.

Viktima është Edison Lala, 29 vjeç, banues në fshatin Strikçan, ndërsa personi që dyshohet se e qëlloi është Bledian Firi, 44 vjeç, banues në Tiranë.

Ngjarja ndodhi rreth orës 13:40, në një zonë pyjore pranë fshatit Fushë-Sopot të Bulqizës, raporton noa.al.

Sipas informacionit paraprak të Policisë, 44-vjeçari Bledian Firi dyshohet se po merrte pjesë në gjueti dhe, teksa ka qëlluar me armë në drejtim të një kafshe të egër, ka goditur nga pakujdesia 29-vjeçarin.

Për shkak të plagëve të marra, Edison Lala ka humbur jetën në vendngjarje.

Pas ngjarjes, Bledian Firi është shoqëruar në ambientet e Komisariatit të Policisë Bulqizë për veprime të mëtejshme hetimore.

Ndërkohë, arma e gjahut, e cila dyshohet se është përdorur gjatë ngjarjes, është sekuestruar në cilësinë e provës materiale.

Grupi hetimor, nën drejtimin e Prokurorisë, vijon punën për zbardhjen e plotë të rrethanave dhe përcaktimin e përgjegjësive ligjore.

Hetimet paraprake janë përqendruar te pista e një të shtëne aksidentale gjatë gjuetisë, por rrethanat përfundimtare të ngjarjes mbeten për t’u sqaruar.