BRUKSEL — Komisionerja për Zgjerimin e Bashkimit Evropian, Marta Kos, ka kërkuar nga autoritetet shqiptare që të vendosin në qendër të reformave shtetërore sundimin e ligjit, pavarësinë e sistemit të drejtësisë dhe lirinë e medias, si kushte kyçe për përparimin e mëtejshëm drejt integrimit.

Gjatë prezantimit të Progres-Raportit vjetor përpara Parlamentit Evropian, Kos vlerësoi se objektivi i Tiranës për të përmbyllur negociatat e anëtarësimit deri në fund të vitit 2027 është i arritshëm, por nënvizoi se ky proces kërkon vijimësi të konsoliduar në reformat më themelore.

Sipas Komisioneres, mbrojtja e të drejtave të njeriut dhe përparimi i dukshëm në standardet mjedisore nuk janë vetëm detyrime administrative ndaj Brukselit, por përbëjnë elemente me ndikim të drejtpërdrejtë në jetën e përditshme të qytetarëve shqiptarë.

“Në të njëjtën kohë, do të na duhet të shohim një vijimësi të përqendrimit te përparimi në fushat kyçe. Kjo është e rëndësishme që Shqipëria të përmbushë objektivin e saj ambicioz, por të arritshëm, për mbylljen e negociatave deri në fund të vitit 2027. Në qendër të çdo përpjekjeje për reforma duhet të jenë sundimi i ligjit, një gjyqësor i pavarur, liria e medias dhe mbrojtja e të drejtave themelore. Përparimi në çështjet mjedisore duhet të jetë gjithashtu një përparësi. Këto çështje kanë rëndësi jo vetëm për anëtarësimin në BE, por edhe për shoqërinë shqiptare dhe jetën e përditshme të qytetarëve,” tha Marta Kos.