TIRANË — Policia e Tiranës ka vendosur masa administrative me nga 5 mijë lekë të reja ndaj 36 pjesëmarrësve në protestën e zhvilluar ditën e martë, të cilët bllokuan qarkullimin e automjeteve në bulevardin “Dëshmorët e Kombit” dhe në Rrugën e Durrësit.

Sipas njoftimit zyrtar të bluve, ndëshkimet administrative u ndërmorën pasi protestuesit penguan lëvizjen e mjeteve të transportit dhe refuzuan t’u bindeshin thirrjeve të përsëritura të efektivëve me megafon për lirimin e menjëhershëm të rrugës.

"Masat administrative janë vendosur pasi, gjatë tubimit të zhvilluar në bulevardin “Dëshmorët e Kombit” dhe në rrugën e Durrësit, këta shtetas kanë bllokuar rrugën, duke penguar qarkullimin e mjeteve të transportit. Pavarësisht thirrjeve të përsëritura të punonjësve të Policisë, nëpërmjet megafonit, për lirimin e rrugës, nuk u janë bindur këtyre thirrjeve. Për secilin është vendosur masa e gjobës në vlerën 5 000 lekë", njoftoi zyrtarisht policia.

Në procesverbalet e förpiluara nga punonjësit e policisë argumentohet se protestuesit kanë kryer bllokimin e rrugës automobilistike përpara Kryeministrisë duke refuzuar urdhrin e policisë për largim.

Me aplikimin e këtyre masave të fundit, numri total i personave të gjobitur arrin në 48 pas hyrjes në fuqi të Aktit Normativ të miratuar më 28 tetor. Ky kuadër i ri ligjor parashikon 9 kategori gjobash që variojnë nga 5.000 deri në 500.000 lekë për shkelje gjatë tubimeve, si bllokimi i akseseve rrugore, fshehja e identitetit apo mosbindja ndaj urdhrave të policisë. Gjithashtu, ndryshimet i japin të drejtë policisë të ndalojë tubimet deri në 72 orë në zona të caktuara kur ka dyshime për dhunë, si dhe parashikojnë krijimin e një regjistri të posaçëm për evidentimin e personave të përfshirë në akte dhune.