Ngjarja që i mori jetën 61 vjeçarit Urim Fiku në Bulqizë bëhet edhe më e rëndë pasi policia lokale konfirmoi para pak çastesh se i ndjeri vdiq pas goditjesh të dyfishta. Ai është sulmuar nga një ari dhe gjithashtu është qëlluar me armë zjarri.

Duke folur për ngjarjen e ndodhur dje në Bulqizë, policia e Dibrës tha sot se fillimisht dyshohej se Fiku kishte humbur jetën si pasojë e sulmit nga një kafshë e egër (ari).

Nga hetimet e kryera deri në këto momente nga grupi hetimor, nën drejtimin e Prokurorisë, dyshohet se 61-vjeçari përveç dëmtimeve të dyshuara se janë të shkaktuara nga kafsha e egër, është konstatuar një plagë e shkaktuar me armë zjarri.

61-vjeçari kishte dalë në mal për të kullotur dhitë dhe, sipas të dhënave paraprake, ishte kthyer në banesë i plagosur.

Rasti ishte raportuar fillimisht në polici nga Spitali i Bulqizës, pasi familjarët kishin kërkuar ndihmë mjekësore për të, duke deklaruar se ishte sulmuar dhe kafshuar nga një kafshë e egër, dyshohet ari.

Tani situata është rënduar sepse nuk duhet kush e qëlloi me armë zjarri 61 vjeçarin. Po ashtu është ende e paqartë se nga i erdhi vdekja të ndjeri, nga sulmi i ariut apo nga qitja me armë zjarri.

Grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes dhe dokumentimin ligjor të saj.