Nju Jork, 4 nëntor 2026 – Kongresmenia demokrate Alexandria Ocasio-Cortez ka siguruar një mandat të pestë në Dhomën e Përfaqësuesve të Shteteve të Bashkuara, duke fituar përballë kandidatit republikan me origjinë shqiptare, Diam Hysenaj.

Sipas rezultateve të raportuara nga agjencia Associated Press, 37-vjeçarja, e cila përfaqëson distriktin e 14-të të Nju Jorkut, mori rreth 79 për qind të votave, kur ishin numëruar 45 për qind e fletëvotimeve. Rezultati u bë i qartë vetëm 20 minuta pas mbylljes së qendrave të votimit.

Kundërshtari i saj, Diam Hysenaj, 44 vjeç, sipërmarrës në sektorin e pasurive të paluajtshme me origjinë nga Shqipëria, nuk arriti të zhvillonte një garë të fortë elektorale.

Një nga faktorët që karakterizoi fushatën ishte edhe diferenca e konsiderueshme në financim. Sipas të dhënave të publikuara, fushata e Hysenajt mblodhi rreth 440 mijë dollarë, ndërsa ajo e Ocasio-Cortez siguroi afërsisht 38 milionë dollarë.

Fitorja e re vjen në një periudhë kur Ocasio-Cortez po shqyrton mundësinë për të kandiduar në zgjedhjet presidenciale të SHBA-së ose për një vend në Senatin amerikan. Ajo ka deklaruar se do të marrë një vendim për të ardhmen e saj politike pas zgjedhjeve të mesmandatit.