Interi ka arritur një fitore bindëse me rezultatin 3-0 në transfertë ndaj Feyenoordit, në sfidën e vlefshme për fazën e ligës së UEFA Champions League. Skuadra zikaltër e drejtuar nga Cristian Chivu ka dominuar plotësisht në stadiumin "De Kuip", duke i shkaktuar një humbje të rëndë ekipit holandez.

Zikaltërit e zhbllokuan rezultatin që në minutën e 8-të përmes mbrojtësit Yann Bisseck. Më pas, në minutën e 34-t, Francesco Pio Esposito dyfishoi shifrat duke u dhënë italianëve një epërsi të komanduar që në pjesën e parë. Në fraksionin e dytë të lojës, Piotr Zieliński realizoi golin e tretë në minutën e 54-t, duke vulosur përfundimisht suksesin e skuadrës milaneze.

Përballja u shoqërua edhe me tensione në tribuna. Pas golit të tretë të Interit, tifozët e Feyenoordit hodhën flakadanë nga jashtë stadiumit, të cilët përfunduan në fushë dhe mbi çatinë e impiantit "De Kuip". Për këtë arsye, gjyqtari u detyrua ta ndërpriste ndeshjen për rreth dy minuta deri në rikthimin e sigurisë. Me këtë fitore, Interi merr tri pikë të rëndësishme në meçin e Champions League, ndërsa Feyenoordi mbyll një mbrëmje me bilanc negativ si në aspektin sportiv, ashtu edhe në atë disciplinor.