Avokati i kryebashkiakut të Tiranës Erion Veliaj, Plarent Ndreca, ka dhënë detaje të reja lidhur me përplasjen mes klientit të tij dhe kryeministrit Edi Rama, si dhe për takimin e zhvilluar brenda mjediseve të burgut të Fierit mes Veliajt dhe ministrit të Drejtësisë, Toni Gogu. Gjatë një interviste të dhënë mbrëmjen e së martës në emisionin "Zonë e Lirë" me gazetarin Arjan Çani, Ndreca bëri me dije se ekipi mbrojtës po vlerëson mundësinë e dorëzimit të një kallëzimi penal ndaj ministrit Gogu.

Sipas Ndrecës, mbrojtja po analizon shkeljet e mundshme ligjore që lidhen me prezencën e ministrit të Drejtësisë në mjediset e paraburgimit. Kryembrojtësi i Veliajt pretendon se Gogu ka kapërcyer kompetencat ligjore duke u takuar për më shumë se një orë e gjysmë me një të pandehur brenda zyrës së drejtorit të burgut. "Jemi duke e vlerësuar. Nuk kemi dalë ende në konkluzion", u shpreh Ndreca lidhur me nisjen e hapave proceduralë ndaj drejtuesit të dikasterit të Drejtësisë.

I pyetur mbi ekzistencën e mundshme të një regjistrimi audio apo video të bisedës konfidenciale mes Veliajt dhe Gogut, avokati mohoi të ketë dijeni direkte, por përjashtoi mundësinë që regjistrimi të jetë kryer nga klienti i tij. "Nuk e kam idenë. Do të ishte shumë mirë të ishte e regjistruar. E vetmja mundësi që të jetë e regjistruar biseda, është që ta ketë regjistruar administrata e burgut apo zoti Gogu. Unë nuk e kam ende atë provë, ai mbase", deklaroi Ndreca.

Ndër të tjera, avokati Ndreca komentoi edhe presionet e aluduara politike nga ana e kryeministrit Edi Rama, duke theksuar se nuk ndien asnjë pasiguri personale apo profesionale. "Nuk kam asnjë frikë sepse jam shumë i qartë për çfarë kam bërë dhe çfarë nuk kam bërë. Bisedat janë pjesë e një komunikimi që nuk është normal për kryeministrin e një vendi", nëvizoi ai. Në përmbyllje, Ndreca zbuloi gjithashtu se Erion Veliaj vuan prej dy muajsh nga një dëmtim fizik në këmbë i pësuar gjatë një ndeshjeje futbolli në paraburgimin e Durrësit, çka e detyron të lëvizë me paterica brenda mjediseve të vuajtjes së dënimit.