Humbja e zgjedhjeve parlamentare më 25 tetor nga ish-presidenti Aleksandër Vuçiç dhe fitorja e lëvizjes studentore kanë shkaktuar një tronditje të thellë politike dhe institucionale në Serbi. Edhe pse forca e re politike ende nuk ka marrë zyrtarisht në dorëzim kontrollin e qeverisë, ushtrisë dhe aparatesh të sigurisë, në vend ka nisur një valë e shpejtë arrestimesh, dorëheqjesh dhe hetimesh për abuzim me pushtetin ndaj zyrtarëve dhe strukturave që më parë ishin nën ndikimin e Partisë Përparimtare Serbe (SNS). Zhvillimet shoqërohen me raportime për orvatje të zyrtarëve të caktuar për të zhdukur dokumente komprometuese.

Mes të arrestuarve kryesorë figuron drejtuesi i policisë kriminale, Marko Kriçak, i cili dyshohet për shpërdorim detyre lidhur me hetimet e një vrasjeje të bujshme, ndërsa më parë ishte akuzuar publikisht edhe për kërcënim me përdhunim ndaj një studenteje gjatë protestave opozitare. Së bashku me të ka përfunduar në pranga edhe një tjetër zyrtar i lartë i policisë. Paralelisht, autoritetet kanë arrestuar edhe Davor Macurën, pronarin e bankës private "Alta" – të cilës i është revokuar licenca – nën dyshimet se ka tentuar të nxjerrë miliona dollarë nga kasaforta e institucionit financiar. Në këtë kuadër, fituesit e zgjedhjeve u kanë bërë thirrje prokurorëve dhe gjyqtarëve të përmbushin detyrën ligjore ose të japin dorëheqjen, ndërsa është rikthyer vëmendja te hetimet e pezulluara për korrupsion në nivele të larta, përfshirë tragjedinë e stacionit hekurudhor të 1 nëntorit 2024.

Pavarësisht zhvillimeve dramatike, Aleksandër Vuçiç ka vazhduar praninë e tij në mediat aleate, duke akuzuar lëvizjen studentore për "terror revolucionar" dhe duke insistuar se nuk ka frikë nga përgjegjësia penale. Gjatë një interviste televizive në "Pink", ai deklaroi: "Unë nuk firmos asgjë dhe asgjë nuk do të gjendet", duke hedhur poshtë akuzat për përfshirje në veprimtari kriminale. Ndërkohë, prokuroria po përballet me denoncime të shumta për abuzime me votën. Avokati Ivan Niniç ka dorëzuar prova mbi një skemë ku punonjës të burgjeve dyshohet se kanë presuar dhe paguar të burgosur për të votuar për Vuçiçin, ndërsa në Mali Zvornik janë arrestuar gjashtë persona për pajisjen e shtetasve boshnjakë me dokumente të rreme për të ndikuar në zgjedhje.

Efektet e rënies nga pushteti po ndihen me shpejtësi edhe në hapësirën mediatike dhe administrative të vendit. Televizioni publik RTS u ka kërkuar ndjesë publike shikuesve për raportimet e mëparshme joprofesionale dhe ka adoptuar një linjë më neutrale, ndërsa hapësira të tjera mediatike si "Informer" dhe "Pink" vazhdojnë të mbeten me ish-presidentin. Në të gjithë Serbinë, punonjës të teatrove, muzeve, spitaleve dhe shkollave po kërkojnë largimin e drejtorëve të emëruar nga SNS, ndërsa analistët politikë vendas vlerësojnë se ky proces shënon fundin përfundimtar të ciklit politik të partisë së Vuçiçit.