Shqipëria është pozicionuar në vendin e 47-të në botë sa i përket rezultateve të nxënësve 15-vjeçarë në shkencë, matematikë dhe lexim, sipas renditjes globale të përgatitur nga Visual Capitalist mbi të dhënat e testimit ndërkombëtar PISA. Me një mesatare prej 425.3 pikësh, Shqipëria arriti të lërë pas të gjitha vendet e tjera të Ballkanit Perëndimor, duke u renditur përpara Malit të Zi (vendi i 50-të me 421.3 pikë), Serbisë (vendi i 51-të me 420.3 pikë), Maqedonisë së Veriut (vendi i 73-të me 371.7 pikë) dhe Kosovës, e cila ndodhet në vendin e 82-të me 349 pikë.

Pavarësisht udhëheqjes në nivel rajonal, performanca e nxënësve shqiptarë mbetet ende nën mesataren e vendeve të OECD-së në të tria lëndët e testuara. Sipas të dhënave, Shqipëria grumbulloi mesatarisht 435 pikë në shkencë, 433 pikë në matematikë dhe 408 pikë në lexim, ku kjo e fundit shënon edhe nivelin më të ulët me 53 pikë më pak se mesatarja ndërkombëtare. Këto rezultate dëshmojnë se, me gjithë përparimin relativ në Rajon, hendeku me standardet e arsimit në vendet e zhvilluara mbetet një sfidë e hapur.

Në shkallë globale, klasifikimi dominues udhëhiqet nga sistemet arsimore të Azisë Lindore, ku rajonet e Kinës, Singapori dhe Tajvani zënë vendet e parë falë disiplinës dhe programeve kërkuese mësimore. Estonia vazhdon të mbetet vendi më i suksesshëm evropian duke u renditur e 7-ta në botë me 511.3 pikë, ndërkohë që fuqi të mëdha si Kanadaja dhe Shtetet e Bashkuara të Amerikës pozicionohen përkatësisht në vendin e 11-të dhe të 16-të.