Presidentja e Maqedonisë së Veriut, Gordana Siljanovska-Davkova, ka deklaruar se rruga e vendit drejt anëtarësimit në Bashkimin Europian po pengohet nga kërkesa e Bullgarisë për ndryshimin e Kushtetutës, me qëllim përfshirjen e pakicës bullgare ndër komunitetet e njohura zyrtarisht. Gjatë fjalës së saj në Samitin e Zgjerimit të Euronews, kreu i shtetit theksoi se Shkupi ka bërë vazhdimisht lëshime përgjatë procesit të integrimit, por nënvizoi se çdo ndërhyrje e mëtejshme në dokumentin themeltar kërkon domosdoshmërisht mbështetjen e qytetarëve, rreth 80 për qind e të cilëve kundërshtojnë këtë kushtëzim.

Kërkesa për përfshirjen e bullgarëve në Kushtetutë buron nga kompromisi i vitit 2022 i ndërmjetësuar nga Franca, zbatimi i të cilit kërkon një shumicë prej dy të tretave në Kuvend që qeveria aktuale nuk e zotëron. Presidentja Siljanovska-Davkova u shpreh se pengesat kryesore për anëtarësim nuk ndërlidhen me mungesën e reformave apo mosplotësimin e kritereve të BE-së, por me mungesën e vullnetit politik nga vendet fqinje. Ajo solli në vëmendje historikun e gjatë të lëshimeve politike të vendit, përfshirë Marrëveshjen e Prespës të vitit 2018 me Greqinë për ndryshimin e emrit zyrtar, duke ngritur pikëpyetje mbi kufijtë e kushtëzimeve bilaterale ndaj një vendi kandidat.

Pavarësisht kësaj ngërçi, presidentja e Maqedonisë së Veriut rikonfirmoi përkushtimin e saj për të vazhduar përpjekjet për gjetjen e një zgjidhjeje përmes dialogut pragmatik me Sofjen zyrtare. Ajo bëri të ditur se ka zhvilluar disa takime me udhëheqësit bullgarë për të përcjellë shqetësimet e Shkupit, ndërsa bëri thirrje për me tepër vullnet politik me qëllim tejkalimin e pengesave diplomatike dhe avancimin e procesit të integrimit evropian.