Panairi i 29-të i Librit "Tirana 2026", i parashikuar për t’u mbajtur nga data 11 deri më 15 nëntor, është shtyrë zyrtarisht për në muajin dhjetor. Vendimi është marrë nga Shoqata e Botuesve Shqiptarë si pasojë e situatës së tensionuar dhe protestave të studentëve në kryeqytet, çka sipas organizatorëve cenon kushtet normale për zhvillimin e këtij aktiviteti madhor kulturor.

Vendimi për shtyrjen erdhi pas konsultimeve të ngushta me botues, pedagogë, mësues dhe lexues, të cilët vlerësuan se rrethanat aktuale nuk garantojnë pjesëmarrjen e nevojshme të vizitorëve. Shqetësim kryesor për organizatorët mbetet pamundësia për të siguruar praninë e fëmijëve dhe të rinjve, të cilët përbëjnë audiencën kryesore të këtij ngjarjeje vjetore.

Shoqata e Botuesve Shqiptarë konfirmoi se Panairi i Librit do të mbahet brenda muajit dhjetor të këtij viti, ndërsa datat e sakta të zhvillimit të tij pritet të bëhen me dije gjatë ditëve në vijim.