BRUKSEL — Mali i Zi mund t’i përmbyllë përfundimisht negociatat për anëtarësim në Bashkimin Evropian deri në fund të dhjetorit të këtij viti, ndërsa nënshkrimi i marrëveshjes zyrtare të pranimit parashikohet të realizohet në qershor të vitit 2027.

Detajet bëhen me dije nga një udhërrëfyes paraprak i Komisionit Evropian, i cili është pjesë e paketës së zgjerimit që pritet të publikohet më 4 nëntor për katër vendet me përparimin më të madh në proces: Malin e Zi, Shqipërinë, Ukrainën dhe Moldavinë.

Sipas dokumentit zyrtar, Podgorica synon mbylljen e kapitujve të mbetur përmes dy konferencave ndërqeveritare në nëntor dhe dhjetor. Në konferencën e parë pritet të mbyllen pesë kapituj që përfshijnë energjinë, transportin, sigurinë ushqimore, tatimet dhe lëvizjen e lirë të mallrave. Më pas, në dhjetor parashikohet mbyllja e kapitujve kyç 23 dhe 24 mbi gjyqësorin dhe të drejtat themelore.

Plani parashikon që drafti i marrëveshjes së anëtarësimit të përfundojë në pranverën e vitit 2027, për t’i hapur rrugë nënshkrimit përfundimtar në verë, pas ratifikimit nga Parlamenti Evropian dhe shtetet anëtare. Ekzekutivi evropian nëliron se marrëveshja do të përmbajë mekanizma të fortë mbikëqyrës deri në ditën e anëtarësimit të plotë, ku në rast prapambetjeje BE ruan të drejtën e shtyrjes së procesit.