POGRADEC — Një aksident i rëndë rrugor ka ndodhur gjatë ditës së sotme në aksin nacional Pogradec–Lin, në afërsi të fshatit Piskupat, ku dy automjete janë përplasur fort me njëri-tjetrin.

Si pasojë e përplasjes, kanë mbetur të plagosur 6 persona, tre në secilin prej mjeteve të përfshira.

Menjëherë në vendngjarje kanë mbërritur shërbimet e urgjencës mjekësore dhe forcat e policisë.

Të gjithë të dëmtuarit janë transportuar me shpejtësi drejt Spitalit Rajonal të Pogradecit për të marrë ndihmën e nevojshme mjekësore, ku sipas bluzave të bardha raportohet se ndodhen jashtë rrezikut për jetën.

Policia po kryen veprimet hetimore për zbardhjen e shkaqeve dhe rrethanave të aksidentit.