SARANDË — Një aksion i rrufeshëm i Policisë së Sarandës ka çuar në arrestimin në flagrancë të një 31-vjeçareje, vetëm 30 minuta pasi ajo kishte vjedhur një automjet nga parkingu i një hoteli në lagjen nr. 1 të qytetit bregdetar.

Autorja e dyshuar, e identifikuar me inicialet E. S., banuese në Sarandë, menjëherë pas marrjes së mjetit në pronësi të shtetasit A. M., i kishte hequr targat dhe i kishte hedhur ato në një kazan mbeturinash në dalje të qytetit për të humbur gjurmët. Megjithatë, reagimi i shpejtë operacional i efektivëve bëri të mundur lokalizimin dhe ndalimin e saj ndërsa po lëvizte me mjetin e vjedhur në afërsi të tunelit të Skërficës.

Pasi kryen veprimet procedurale dhe sekuestrimin e automjetit, specialistët për Hetimin e Krimeve arrestuan 31-vjeçaren për veprën penale "Vjedhja", ndërsa materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë për veprime të mëtejshme.