TIRANË — Detaje të reja dhe të forta kanë dalë në dritë lidhur me përplasjen mes kryetarit të Bashkisë së Tiranës, Erion Veliaj, dhe ekzekutivit. Deputeti Plarent Ndreca ka zbardhur prapaskenat e vizitës së ministrit të Drejtësisë, Toni Gogu, në ambientet e paraburgimit, duke vënë në pikëpyetje procedurat e ndjekura gjatë këtij takimi.

Ndreca ka bërë me dije se nuk ka pasur asnjë kërkesë zyrtare nga ana e Veliajt për t’u takuar me anëtarin e kabinetit qeveritar, ndërsa ka kontestuar rreptësisht orarin dhe formatin e realizimit të kësaj bisede brenda institucionit të ekzekutimit të vendimeve penale.

“Nuk ka kërkesë nga Veliaj për ta takuar Gogun. Ai nuk mund të shkojë në orën 22:30 të darkës. Nëse do të shkonte për zbatimin e detyrës, duhet të shkonte në mënyrë zyrtare, jo të takonte për një orë e gjysmë një person nën hetim në zyrën e drejtorit të burgut. Nëse ka qëllim të inspektojë kushtet në burg, duhet të shkojë me inspektorë”, u shpreh Ndreca.

Kjo deklaratë i shton të tjera hije dyshimi përplasjes institucionale dhe procedurale rreth kushteve të izolimit dhe transferimit të kryebashkiakut të Tiranës, ndërsa mbrojtja vazhdon të këmbëngulë në paligjshmërinë e veprimeve të ndërmarra ndaj tij.