BRUKSEL — Kryeministri Edi Rama ndodhet këtë të martë në Bruksel për të marrë pjesë në "Euronews Enlargement Summit", një forum i nivelit të lartë i kushtuar procesit të zgjerimit të Bashkimit Evropian dhe perspektivës evropiane të vendeve kandidate.

Sipas njoftimit zyrtar nga Kryeministria, kreu i qeverisë shqiptare do të bisedojë me gazetarët e rrjetit mediatik Euronews mbi ecurinë e reformave dhe avancimin e Shqipërisë në këtë proces, ku po vijojnë takimet teknike për përmbylljen e grupkapitujve negociues.

Në kuadër të kësaj vizite zyrtare, Kryeministri Rama do të zhvillojë gjithashtu takime dypalëshe me Presidentin e Këshillit Evropian, António Costa, si dhe me Sekretarin e Përgjithshëm të NATO-s, Mark Rutte.

Diskutimet me drejtuesit e lartë të BE-së dhe Aleancës do të fokusohen te hapat e ardhshëm të integrimit evropian, bashkëpunimi rajonal dhe çështjet e sigurisë në rajon.