VLORË — Katër anije luftarake të NATO-s, dy prej të cilave gjermane, një italiane dhe një spanjolle, kanë mbërritur në portin e Vlorës për të zhvilluar një aktivitet të përbashkët ushtarak me Forcën Detare Shqiptare.

Mjetet detare të Aleancës do të qëndrojnë në Gjirin e Vlorës deri më 6 nëntor. Sipas programit zyrtar, përgjatë datave 3 dhe 4 nëntor ekuipazhet do të kryejnë vizita portuale, ndërsa më 5 dhe 6 nëntor do të zhvillohen manovrat e përbashkëta detare dhe ajrore në bashkëpunim me flotën shqiptare.

Stërvitja synon rritjen e ndërveprueshmërisë dhe koordinimit operacional mes forcave aleate përmes ushtrimeve nga deti dhe ajri, komunikimit taktik dhe përgatitjes së personelit për misionet e përbashkëta të NATO-s. Kjo është hera e dytë brenda një muaji që luftanijet e Aleancës ankorohen në Gjirin e Vlorës për manovra ushtarake.