Aleanca e Profesionistëve të Lirë (APL) ka analizuar efektet e paketës së re fiskale të propozuar nga qeveria, duke paralajmëruar se disa prej masave të saj mund të frenojnë investimet, të rrisin çmimet e konsumit dhe të rëndojnë mbi sipërmarrjen e vogël.

Mbështetur në të dhënat e Eurostat dhe INSTAT për fuqinë blerëse, analiza nxjerr në pah hendekun e thellë mes kostos së lartë të jetesës dhe nivelit të pagave në Shqipëri krahasuar me vendet e tjera të Ballkanit Perëndimor, ku çmimet e ushqimeve arrijnë në 104% të mesatares së Bashkimit Europian, ndërsa niveli i përgjithshëm i çmimeve fiksohet në 73%.

Pavarësisht se masat si ulja e TVSH-së nga 20% në 6% për 54 produkte bazë ushqimore dhe heqja e taksës së qarkullimit nga nafta vlerësohen si pozitive nga APL, pëfitimi i tyre mbetet i kushtëzuar nga pasqyrimi i plotë te konsumatori final.

Për më tepër, kursimi nga karburanti rrezikon të zbehet nga rritja e taksës vjetore të mjetit deri në dyfish.

Në të njëjtën kohë, rritja e TVSH-së standarde nga 20% në 21% parashikohet të shtrenjtojë më tej kategori ku Shqipëria është tashmë më e shtrenjta në rajon, si veshjet, mobiljet, pajisjet teknologjike dhe shërbimet e telefonisë, të cilat përbëjnë edhe mjetet kryesore të punës për profesionistët e pavarur.

Goditjen më të drejtpërdrejtë nga kjo reformë pritet ta marrin profesionet e lira dhe bizneset e vogla. Ulja e pragut të TVSH-së nga 10 në 5 milionë lekë qarkullim vjetor do të përfshijë në skemën e taksimit rreth 17,500 tatimpagues të rinj, duke u shtuar atyre barrën administrative dhe kosto të reja për deklarime e faturime.

Paralelisht, propozimi për rritjen e tatimit mbi dividendin nga 8% në 15% do të rrisë barrën mbi fitimin e shpërndarë deri në 29.45%, një masë kjo që sipas APL-së çon drejtpërdrejt në frenimin e riinvestimeve, penalizimin e punësimit dhe bllokimin e rritjes së pagave në sektorin privat.