Ish-ministrja socialiste Ermelinda Meksi ka reaguar publikisht lidhur me pretendimet e kryetarit të Bashkisë së Tiranës, Erion Veliaj, për vizitën e ministrit të Drejtësisë, Toni Gogu, në ambientet e burgut të Fierit.

Përmes një postimi në rrjetet sociale, Meksi e ka cilësuar ngjarjen si një zhvillim që kalon përmasat e një përplasjeje brenda Partisë Socialiste, duke nënvizuar se nëse pretendimet për presion politik mbi një person në paraburgim vërtetohen, kjo përbën një precedent tejet shqetësues për shtetin e së drejtës. Ajo theksoi se përgënjeshtrimi formal i ministrit Gogu nuk mjafton dhe kërkoi transparencë të plotë mbi rrethanat, cilësinë dhe dokumentimin e kësaj vizite.

Ish-politikania socialiste kërkoi reagim në tri nivele institucionale: sqarim ligjor nga Ministria e Drejtësisë, garanci nga kryeministria se ekzekutivi nuk po përdoret për pazare politike, si dhe verifikim të pavarur nga institucionet e drejtësisë. Meksi nënvizoi se kjo kërkesë nuk synon amnistimin e Veliajt nga akuzat penale, por mbrojtjen e parimeve demokratike dhe të drejtave të çdo qytetari.