Nënkryetari i Kuvendit dhe deputeti i Partisë Demokratike, Agron Gjekmarkaj, ka deklaruar se forca e tij politike është e hapur për bashkëpunim me të gjitha faktorët opozitarë për të ndërtuar një front të gjerë zgjedhor, duke i bërë thirrje forcave të drejtuara nga Agron Shehaj dhe Adriatik Lapaj, ndërsa ka përjashtuar një marrëveshje me Lëvizjen Bashkë të Arlind Qorit.

I ftuar në emisionin “Now” në Euronews Albania, Gjekmarkaj iu referua modelit politik italian të njohur si “Campo Largo”, duke nënvizuar se Partia Demokratike është e gatshme të ulet në tryezë me parti të tjera opozitare, grupe qytetare dhe studentore pa parakushte për të përcaktuar një strategji fituese për drejtimin e Tiranës dhe të vendit.

Ai sqaroi se procesi i bisedimeve duhet të zhvillohet mbi parime të përbashkëta dhe pa kushte absolutiste nga forcat më të vogla politike. Lidhur me emrin e kandidatit për zgjedhjet e ardhshme, nënkryetari i Kuvendit nënvizoi se Partia Demokratike mbetet e hapur për të diskutuar çdo opsion që garanton arritjen e një rezultati fitues.