Vajza 18-vjeçare e aktorëve Angelina Jolie dhe Brad Pitt, Vivienne, ka ndryshuar zyrtarisht mbiemrin e saj duke hequr përfundimisht atë të të atit. Gjykata e Lartë e Los Angeles-it ka miratuar kërkesën ligjore të saj për ta ndryshuar emrin e plotë nga Vivienne Marceline Jolie-Pitt në Vivienne Marceline Jolie.

Seanca gjyqësore u zhvillua në gjykatën Stanley Mosk, ku gjyqtari kryesues miratoi kërkesën e paraqitur nga avokati i 18-vjeçares. Në dokumentet gjyqësore të siguruara nga mediat amerikane, Vivienne ka cituar arsye personale për vendimin e saj, ndonëse ajo e përdorte publikisht vetëm mbiemrin e nënës prej më shumë se dy vitesh në projektet artizanale dhe artistike ku kishte marrë pjesë.

Me këtë vendim, Vivienne i bashkohet pjesës më të madhe të fëmijëve të ish-çiftit të njohur të cilët kanë ndërmarrë hapa ligjore për të hequr mbiemrin e aktorit. Më parë, kërkesa të ngjashme janë miratuar nga gjykata edhe për motrat dhe vëllezërit e saj më të mëdhenj, Shiloh, Zahara dhe Maddox, duke zyrtarizuar përdorimin e vetëm të mbiemrit Jolie.