Pas dekretimit të 9 majit 2027 si data zyrtare për zhvillimin e zgjedhjeve vendore, janë artikuluar edhe emrat e parë që synojnë drejtimin e bashkive në vend. Ish-deputeti Lefter Maliqi ka bërë publike ambicien e tij për të garuar nën siglën e Partisë së Lirisë për marrjen e drejtimit të Bashkisë së Kuçovës.

Gjatë një interviste televizive në emisionin “Studio Live” në Report Tv, Maliqi konfirmoi se ka marrë mbështetjen e plotë politike nga kreu i Partisë së Lirisë, Ilir Meta, pas disa takimeve të zhvilluara me të në ambientet e paraburgimit. Ai bëri me dije se gjatë këtyre bashkëbisedimeve janë diskutuar zhvillimet e fundit politike dhe përgatitjet strategjike për qarkun e Beratit.

Maliqi theksoi se do të jetë kandidati zyrtar i Partisë së Lirisë për këtë bashki, ndërsa shtoi se për këtë vendimmarrje është vënë në dijeni edhe kryetari i Partisë Demokratike, Sali Berisha. Ish-deputeti nënvizoi se synon të hyjë në garën e 9 majit si një kandidaturë e përbashkët e të gjithë spektrit opozitar.