Shërbimi i Toksikologjisë në Qendrën Spitalore Universitare “Nënë Tereza” (QSUT) ka hedhur poshtë pretendimet e përhapura së fundmi se rreth 300 të rinj kishin kërkuar ndihmë mjekësore gjatë festës së Halloween-it si pasojë e përdorimit të lëndëve narkotike apo vendosjes së tyre nëpër pije.

Sipas të dhënave zyrtare nga spitali, gjatë fundjavës së festimeve është regjistruar vetëm një person që ka marrë trajtim mjekësor në këtë repart. Reagimi i autoriteteve shëndetësore erdhi pas ngritjes së shqetësimeve lidhur me përdorimin e mundshëm të substancave që shkaktojnë humbje të vetëdijes dhe të kujtesës.

Shefi i Shërbimit të Toksikologjisë, Andrin Tahiri, u bëri thirrje të rinjve të tregojnë kujdes të shtuar gjatë daljeve në ambiente me grumbullime njerëzish. Ai këshilloi shmangien e konsumimit të pijeve të lëna pa mbikëqyrje, zëvendësimin e tyre nëse largohen nga tavolina, si dhe daljen vetëm me persona të besuar.

Mjeku paralajmëroi gjithashtu për rreziqet e larta që sjell përzierja e lëndëve narkotike me alkoolin, duke nënvizuar se pasojat për shëndetin mund të jenë të rënda dhe të pakthyeshme.