Gjykata Themelore në Gjilan ka vendosur masën e paraburgimit prej 30 ditësh ndaj shtetasit me iniciale B. D., i dyshuar për vrasje të rëndë dhe armëmbajtje pa leje, lidhur me ngjarjen e rëndë që tronditi fshatin Demiraj ku mbetën të vdekur dy pjesëtarë të së njëjtës familje.

Masa e sigurisë është miratuar pas kërkesës së Prokurorisë Themelore në Gjilan, e cila po vlerëson rrethanat e krimit të ndodhur në orët e para të datës 1 nëntor. Sipas organit të akuzës, dyshohet se B. D. ka privuar nga jeta djalin e tij, A. D., pas një konflikti fizik të çastit brenda ambientit të banesës së tyre.

Hetimet e mëtejshme kanë nxjerrë në dritë detaje shtesë mbi rrethanat e tragjedisë, ku vajza e mitur me iniciale D. D. është gjetur pa shenja jete me njolla gjaku dhe shenja dhune në dhomën e babait të saj të ndjerë. Grupi hetimor ngre dyshime se edhe vdekja e të miturës është shkaktuar nga vetë babai i saj, A. D., përpara se ky i fundit të qëllohej nga i ati.

Gjyqtari i procedurës paraprake vlerësoi se caktimi i masës së paraburgimit është i nevojshëm për shkak të rrezikut të ndikimit mbi dëshmitarët apo manipulimit të provave nga i dyshuari. Mbrojtja e palës së dyshuar ka të drejtën e ankesës ndaj këtij vendimi në Gjykatën e Apelit të Kosovës.