Një konflikt mes fqinjëve për zhurmën e muzikës ka përfunduar në mënyrë tragjike në Albuquerque të New Mexico-s, ku një vajzë 16-vjeçare ka humbur jetën pasi u qëllua me armë zjarri nga një fëmijë 10 vjeç.

Ngjarja e rëndë ka ndodhur të shtunën në një kompleks banimi, ku një përplasje verbale mes dy familjeve për shkak të muzikës së lartë u përshkallëzua me shpejtësi në përleshje fizike, duke përfshirë edhe fëmijët e të dyja palëve.

Hetimet paraprake të autoriteteve vendose konfirmojnë se nëna e 10-vjeçarit, 40-vjeçarja Elaina Gomez-Vileda, i ka kërkuar të birit të shkonte në apartament për të marrë pistoletën. Pasi mori armën, fëmija u kthye në vendngjarje dhe qëlloi në kokë 16-vjeçaren Kaiserlein Rangel, e cila kishte ndërhyrë midis dy grave për të shmangur konfliktin. Adoleshentja ndërroi jetë menjëherë në vendngjarje për shkak të plagës së marrë.

Pas të shtënave, 40-vjeçarja u strehua në banesë bashkë me të birin dhe njoftoi shërbimet e emergjencës duke pretenduar se ishte sulmuar nga fqinjët. Momente më pas, babai i viktimës tentoi të hynte me forcë në apartamentin e të dyshuarve, ndërsa gjatë ndërhyrjes së forcave të policisë u raportua se pati edhe të shtëna të tjera me armë zjarri.

Policia arrestoi 40-vjeçaren Elaina Gomez-Vileda, ndaj së cilës rëndojnë akuza të rënda si vrasje, komplot për vrasje, keqtrajtim i të miturit dhe neglizhencë për lejimin e aksesit të fëmijëve në armë zjarri. Nga verifikimet e kryera doli se pistoleta e përdorur në këtë ngjarje rezultonte e raportuar më parë si e vjedhur. Ndaj 10-vjeçarit ende nuk është ngritur ndonjë akuzë zyrtare, ndërsa autoritetet po vlerësojnë procedurat e mëtejshme ligjore për shkak të moshës së tij të mitur.