TIRANË, 2 nëntor — Komisioneri Shtetëror i Zgjedhjeve, Ilirjan Celibashi, i ka kërkuar zyrtarisht Komisionit të Ankimimeve dhe Sanksioneve (KAS) vendosjen e masave administrative financiare ndaj 13 subjekteve politike. Kërkesa vjen pas auditimit të raporteve financiare lidhur me fondet e përfituara dhe shpenzimet e kryera gjatë fushatës për zgjedhjet parlamentare të 11 majit 2025.

Sipas dokumentacionit të përcjellë pranë KAS-it, procesi i verifikimit ka nxjerrë në pah një sërë shkeljesh të Kodit Zgjedhor dhe detyrimeve ligjore për transparencë financiare. Ndër parregullsitë kryesore të konstatuara përfshihen vonesat ose mosdorëzimi i raporteve nga kandidatët e listave shumëemërore, mospërputhjet kontabël, gabimet aritmetike, si dhe mosdeklarimi i transaksioneve bankare gjatë periudhës zgjedhore.

Sanksionet financiare të propozuara nga Komisioneri Zgjedhor ndahen në tri kategori, sipas shkallës së shkeljes:

Sanksion me gjobë 2,000,000 lekë (për mosdorëzim të raportit financiar):

Partia Rruga e Vërtetë Shqiptare

Partia Aleanca Arbnore Kombëtare

Sanksion me gjobë 500,000 lekë:

Partia Bashkimi Liberal Demokrat

Partia Aleanca Demokracia e Re

Partia Aleanca Konservatore për Shqipërinë

Partia Kristian Demokrate

Partia Lëvizja Atdheu

Partia Aleanca Kombëtare Shqiptare

Sanksion me gjobë 100,000 lekë:

Partia Balli Kombëtar

Partia Bashkimi për të Drejtat e Njeriut

Partia Djathtas 1912

Partia Socialdemokrate

Partia Nisma Thurje

KAS ka nisur ditën e sotme shqyrtimin e kërkesës zyrtare të KQZ-së për të marrë vendimin përfundimtar mbi zbatimin e këtyre masave administrative.