BRUKSEL — Kryeministri i Belgjikës, Bart De Wever, i ka paraqitur dorëheqjen e qeverisë së tij Mbretit Philippe gjatë orëve të mëngjesit të sotëm, pas dështimit të negociatave maratonë për miratimin e buxhetit të shtetit.

De Wever u largua nga Pallati Mbretëror pas një takimi prej rreth një orë e gjysmë me monarkun belg, pa dhënë deklarata për mediat, ndërsa Mbreti Philippe pritet të njoftojë vendimin nëse do ta pranojë dorëheqjen, do ta marrë në konsideratë apo do të kërkojë hapësirë të mëtejshme negociuese. Dështimi i traktativeve erdhi për shkak të përplasjeve të thella brenda koalicionit pesë-partiak "Arizona", ku partitë e qendrës dhe ato socialiste kërkuan rreth 1.5 miliardë euro të ardhura shtesë përmes taksimit të të pasurve, ndërsa konservatorët e N-VA insistuan në shkurtimin e shpenzimeve publike.

Belgjika përballet me një situatë të rënduar financiare, ku deficiti buxhetor arriti në 5 për qind vitin e kaluar kundrejt tavanit evropian prej 3 për qind, ndërsa borxhi kombëtar ka kapërcyer shifrën e 735 miliardë eurove, apo mbi 110 për qind të Prodhimit të Brendshëm Bruto. Dështimi i koalicionit për të arritur një marrëveshje ka nxitur rritjen e normave të interesit për obligacionet shtetërore dhe ka ngritur shqetësime për kthimin e vendit te sistemi i financimit të përkohshëm buxhetor.