Kryetari i Partisë Demokratike, Sali Berisha, ka lëshuar akuza të forta ndaj Prokurorisë së Posaçme (SPAK), duke e cilësuar atë si një institucion partiak dhe patericë kryesore të narkoshtetit që ka amnistuar krimin elektoral në Shqipëri.

Gjatë një deklarate për mediat pas daljes nga ambientet e prokurorisë, Berisha theksoi se krimi elektoral është i dokumentuar nga raportet e institucioneve ndërkombëtare si ODIHR, Asambleja Parlamentare e Këshillit të Evropës dhe Parlamenti Evropian, të cilat konfirmuan shkrirjen e partisë në pushtet me shtetin gjatë zgjedhjeve të 11 majit. Kryedemokrati akuzoi drejtuesit e prokurorisë për mbylljen e syve përballë shkeljeve kushtetuese dhe përdori ton të ashpër edhe për mjedisin e brendshëm të ndërtesës, duke pretenduar se u detyrua të përdorte shami xhepi si maskë për shkak të erës së lëndëve opiate.

Sipas Berishës, mos hetimi i krimeve zgjedhore nga struktura e posaçme përbën shkelje të rëndë kushtetuese në shërbim të pushtetit, të cilin ai e quajti shkatërruesin dhe varfëruesin më të madh të qytetarëve shqiptarë.

Deklarata:

"Edhe njëherë dua të denoncoj krimin monstruoz të amnistisë nga ky institucion partiak të krimit elektoral. Krimi elektoral në Shqipëri është sot i certifikuar me dokumentet më themelore të institucioneve ndërkombëtare që merren me zgjedhjet. Krimi elektoral në Shqipëri ka arritur formën më të egër, më barbare, atë që quhet parti-shtet. Institucionet më serioze ndërkombëtare, ODIHR, Asambleja Parlamentare e Këshillit të Evropës dhe Parlamentin Evropian kanë gjetur se zgjedhjet e 11 majit, partia dhe shteti, institucioni dhe strukturat partiake u shkrinë në një.

Por kjo për Altin Hajrin Gjokën Troplinin Farrukun, se zinxhirin e ka të pafundëm ky, pra për të, kjo nuk është krim. Ky seksion i PS kryen krim të rëndë kushtetues kur nuk heton krimin elektoral dhe e amniston atë. Shndërrohet në patericë kryesore të narkoshtetit dhe jo rastësisht mund t’u them se radhën tjetër do vij me maska antidrogë se aty qelbej drogë vendi. Nuk e di se ç’kishte ndodhur sot, por u detyrova të përdor një shami xhepi si maskë për shkak të kundërmimit në të katër anë drogë të këtij institucioni. Dhe krenarë se janë institucion i narkoshtetit. Krenarë se mbrojnë narkoshtetin, i cili përbën pushtuesin më të egër të kombit shqiptar në të gjitha kohërat. Përbën shkatërrimtarin më të madh të qenies sonë kombëtare, varfëruesin më të madh të shqiptarëve," tha Berisha