PRISHTINË — Agjencia e Ushqimit dhe Veterinarisë (AUV) ka bllokuar importin e një ngarkese prej më shumë se 25 tonë misër merkantil dhe ka ndaluar shitjen e një produkti ushqimor për kafshë, pasi kontrollet laboratorike konstatuan praninë e aflatoksinës mbi normat e lejuara ligjore.

Gjatë kontrollit kufitar të ngarkesës prej 25,120 kg misër të destinuar për një kompani nga Gjilani, analizat e AUV-së dhe ato të Institutit Kombëtar të Shëndetësisë Publike konfirmuan praninë e aflatoksinës B1 në nivel prej 30 µg/kg dhe aflatoksinë totale prej 47 µg/kg, përkundrejt vlerës maksimale referente prej 10 µg/kg. Pas këtyre rezultateve, Inspektorati Fitosanitar vendosi refuzimin e menjëhershëm të importit dhe kthimin e ngarkesës mbrapsht në vendin e origjinës.

Në vijim të inspektimeve në tregun e brendshëm, AUV konstatoi nivele të larta të mikotoksinës edhe në produktin “Ushqim për viça deri 300 kg”, duke urdhëruar tërheqjen e menjëhershme nga qarkullimi. Aflatoksina B1 është një substancë mjaft toksike e prodhuar nga myku, e cila shkakton dëmtime në mëlçi dhe mund të bartet te qumështi i kafshëve si aflatoksinë M1, duke cenuar drejtpërdrejt sigurinë ushqimore.